សម្តេចតេជោ រំលឹងពីព្រឹត្តិការណ៍ មុនថ្ងៃឈានដល់ចុះហត្ថលេខាលើកិច្ចព្រមព្រៀង ដែលនិយមហៅថា(កិច្ចព្រមព្រៀងប៉ារីស) ២៣ តុលា ១៩៩១.....

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា នាថ្ងៃទី២៣ ខែតុលា ឆ្នាំ២០២៦នេះ បានសរសេរសារលើកឡើងពីព្រឹត្តិការណ៍ មុនថ្ងៃឈានដល់ចុះហត្ថលេខាលើកិច្ចព្រមព្រៀង ដែលនិយមហៅថា(កិច្ចព្រមព្រៀងប៉ារីស) ២៣ តុលា ១៩៩១។

តាមរយៈបណ្តាញសង្គមការងារផ្លូវការ សម្តេចតេជោ បានសរសេរថា «ក្រឡេកមើលទៅក្រោយ! ថ្ងៃ២៣តុលា១៩៩១ម៉ោង៣ល្ងាចនៅទីក្រុងប៉ារីសប្រទេសបារាំងមានការចុះហត្ថលេខាលើកិច្ចព្រមព្រៀងដែលនិយមហៅថា(កិច្ចព្រមព្រៀងប៉ារីស)។

ដើមឈើមួយដើមត្រូវមានគល់ មានដើម មានមែក មានស្លឹកទើបហៅថាដើមឈើបាន។ ដូចគ្នានេះដែរកិច្ចព្រមព្រៀងប៉ារីស បានចាប់ផ្តើមពីជំនួបចរចារវាងសម្តេច ព្រះនរោតម្តសីហនុជាមួយរូបខ្ញុំហ៊ុន សែនដែលគេតែងនិយាយថា(ជំនួបសីហនុ.ហ៊ុន សែន)ថ្ងៃ២ធ្នូ១៩៨៧។

គ្មានជំនួបសីហនុ .ហ៊ុន សែនវាក៏គ្មានកិច្ចព្រមព្រៀងប៉ារីសដែរ។ យើងបានប្រើពេលជាច្រើនដើម្បី សម្រេចបានកិច្ចព្រមព្រៀងមួយនេះ។ បើគិតពីថ្ងៃ២ធ្នូ១៩៨៧ដល់២៣តុលា១៩៩១គឺមានរយះពេល១,៤២១ថ្ងៃត្រូវជា២០៣សប្តាហ៍ស្មើនិង៤៦ខែនិង ២១ថ្ងៃឬ៣ឆ្នាំ១០ខែនិង២១ថ្ងៃ។

ខ្ញុំជាមនុស្សតែម្នាក់គត់ដែលមានវេទិការចរចាច្រើនជាងគេ(ពាក្យនេះពួកតាំងខ្លួនជាបិតា២៣តុលាច្បាស់ជាពេប ជ្រាយ) ដែលអាចបញ្ជាក់បាននៅត្រង់មួយទល់បី(ខ្ញុំហ៊ុន សែនត្រូវតទល់ជាមួយសម្តេចព្រះនរោតម្តសីហនុផង ជាមួយលោកតាសឺន សានផងជាមួយខៀវ សំផនផង)ដែលពេលខ្លះជួបដោយឡែកនិងពេលខ្លះជួបរួម។

ឯដៃគូរបរទេសមិនថាប្រទេសគាំទ្រទេប្រទេសដែលមិនគាំទ្រក៏ត្រូវការជួបជាមួយហ៊ុន សែនដើម្បីពន្យល់គ្នា ឬស្វែងយល់ឬស្វែងរកការស្រុះស្រួល។

នៅក្នុងវេទិការចរចាខ្ញុំជាមនុស្សដែលមានវ័យក្មេងជាងគេក្នុងចំណោមភាគីកម្ពុជានិងប្រតិភូពីប្រទេសដែលចូលរួម ដែលចាប់ផ្តើមចរចាអាយុ៣៥ឆ្នាំនិងពេលចុះហត្ថលេខាអាយុ៣៩ឆ្នាំ។

អបអរសាទរខួបលើកទី៣៥ឆ្នាំនៃកិច្ចព្រមព្រៀងប៉ារីស២៣តុលា១៩៩១»៕