ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្នអញ្ជើញបើកវេទិកាថ្នាក់ជាតិស្តីពី «ហិរញ្ញប្បទានសម្រាប់សហគ្រាសធុនមីក្រូ តូច និងមធ្យម (MSMEs)» លើកទី១ ឆ្នាំ២០២៦.....

នាព្រឹកថ្ងៃទី២៧ ខែតុលា ឆ្នាំ២០២៦ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអញ្ជើញជាអធិបតីក្នុងពិធីបើក វេទិកាថ្នាក់ជាតិស្តីពី «ហិរញ្ញប្បទានសម្រាប់សហគ្រាសធុនមីក្រូ តូច និងមធ្យម (MSMEs)» លើកទី១ ឆ្នាំ២០២៦ ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs» ដែលសហការរៀបចំដោយ ធនាគារអភិវឌ្ឍន៍ជនបទ និងកសិកម្ម (ARDB) និង សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC)។

វេទិកាថ្នាក់ជាតិនេះរៀបចំឡើងក្នុងគោលបំណងលើកកម្ពស់កិច្ចសន្ទនា ការផ្លាស់ប្តូរចំណេះដឹង និងបទពិសោធន៍ ព្រមទាំងពង្រឹងកិច្ចសហប្រតិបត្តិការរវាងស្ថាប័នរាជរដ្ឋាភិបាល វិស័យធនាគារ វិស័យហិរញ្ញវត្ថុមិនមែនធនាគារ វិស័យឯកជន និងភាគីពាក់ព័ន្ធ ដើម្បីស្វែងរកដំណោះស្រាយ និងយន្តការហិរញ្ញប្បទានប្រកបដោយប្រសិទ្ធភាព និងឆ្លើយតបទៅនឹងតម្រូវការជាក់ស្តែងរបស់ MSMEs។

កិច្ចខិតខំប្រឹងប្រែងរួមគ្នានេះ នឹងរួមចំណែកដល់ការកាត់បន្ថយគម្លាតហិរញ្ញប្បទាន និងបង្កើនលទ្ធភាពទទួលបានហិរញ្ញប្បទានសម្រាប់ MSMEs សំដៅជំរុញការរីកចម្រើនរបស់សហគ្រាស និងការអភិវឌ្ឍសេដ្ឋកិច្ចជាតិប្រកបដោយចីរភាព។

វេទិកាថ្នាក់ជាតិនេះមានរយៈពេល២ថ្ងៃចាប់ពីថ្ងៃទី២៧ និងទី២៨ ខែតុលា ឆ្នាំ២០២៦។នៅ មជ្ឈមណ្ឌលសន្និបាត និងពិព័រណ៍កោះពេជ្រ (អគារ A, B និង C) រាជធានីភ្នំពេញ។